Энэ сарын 6-нд Орхон аймаг “Хойд бүс-Эрдэнэт 2025” эдийн засгийн форум зохион байгуулж, 2028 он хүртэл хэрэгжүүлэх гурван томоохон төслөө иргэд, олон нийтэд танилцуулав. 
Тэдгээрийн нэг нь “Эрүүл, оюунлаг хот” төсөл юм. Төслийн танилцуулгыг аймгийн Засаг даргын орлогч Д.Соёлчхүү хийсэн. 

 Ирээдүйн “Эрүүл, оюунлаг Эрдэнэт хотыг бий болгох  суурь салбар нь боловсрол гэж үзэн шинээр цэцэрлэг, сургууль барьж удаашралтай бүтээн байгуулалтуудаа ашиглалтад оруулахаар төлөвлөжээ. Төслийн хүрээнд сургууль цэцэрлэгийн хүртээмжийг нэмэгдүүлэх 22 дэд төслийг хэрэгжүүлнэ.  Өөрөөр хэлбэл, хүүхэд гэрээсээ хамгийн ихдээ 1 км зайд цэцэрлэгт, 1,5 км зайд сургуульдаа очдог байх, анги дүүргэлтийг цэцэрлэгт 20-25, сургуульд 25-30 байх нөхцөлийг бүрдүүлснээр төслийн үндсэн зорилго ойрхон цэцэрлэг, ойрхон сургууль, эрүүл хүүхэд эрүүл орчныг бүрдүүлнэ гэж үзэж буй. 

Төслийг боловсруулахдаа өнөөгийн Орхон аймаг, Эрдэнэт хотын боловсролын нөхцөл байдлыг судалж үзжээ. 

Цэцэрлэгийн хүртээмжийн асуудал дээр жишээ татъя. 

Эрдэнэт хотод 38 цэцэрлэг үйл ажиллагаа явуулж байгаагийн хотын төвийн 7 багт 19 цэцэрлэг төвлөрсөн байгаа нь хүүхдийн ачаалал ихтэй байна.  Хамгийн их анги дүүргэлт 44 хүүхэдтэй, гэр хорооллын зарим айл өрх цэцэрлэгээсээ 2,5 км зайд алслагдсан байна. Нөгөө талдаа шинээр үүсэж байгаа орон сууцны хорооллуудад 7а, 2а, Уурхайчин, 1а зэрэг 4000 мянган  иргэдтэй хорооллын дунд нэг ч цэцэрлэг, сургууль байхгүй байгаа нь өнөөгийн тулгамдсан асуудал болоод буй. Тиймээс 2028 он хүртэл шинээр 9 байршилд 1800 хүүхдийн цэцэрлэг барьж, холоос явах зайг 1 км болгон бууруулах зорилтыг дэвшүүлжээ. 

Мөн 9  байршилд 4500 хүүхдийн багтаамжтай сургууль барина. Өнөөгийн 45 хүүхэдтэй анги дүүргэлтийг 35 болгосноор ачаалал буурч  суралцагчийг хөгжүүлэх боломж бүрдэнэ гэж харж байна.

Энэхүү төсөлтэй холбоотойгоор эрдэмтэн, судлаачид дараах саналыг хэлсэн. 

ХААИС-ийн Агроэкологийн сургуулийн ахлах багш Д.Сүхбат:
-Энэ олон бүтээн байгуулалтын ард үндсэн төлөвлөлт нь Хот байгуулалтын тухай хуульд зааснаар 70/30 гэдгээ мөрдөх шаардлагатай. Өөрөөр хэлбэл, 30 хувьд нь авто зосгоол, ногоон  байгууламжтай байна гэдэг том зургаа харж явбал хотын өмнөх алдааг давтахгүй байх сургамж болно. 

АШУИС-ийн Био Анагаахын хүрээлэнгийн захирал доктор, дэд профессор Ч.Баттогтох: 
-Эрүүл, оюунлаг хот төслийнхөө хүрээнд эрүүл мэндийн салбарт хэрэгжих хэд хэдэн төслийг танилцууллаа.Өвдсөн хойно нь эмнэлгийн тоог нэмэх биш өвдөхөөс урьтаж, урьдчилан сэргийлэх арга хэмжээг хэрхэн хэрэгжүүлэхэд түлхүү анхаарах хэрэгтэй.