Аймгийн Засаг даргын шуурхай хуралдаан боллоо. Хуралдааныг Засаг даргын орлогч Д.Соёлчхүү удирдан явуулав.  Шуурхай хуралдаанаар өнгөрсөн долоо хоногийн баасан гаригт өгсөн үүрэг даалгаврын биелэлт, хэрэгжилтийн явц, шийдвэрлэхэд тулгамдаж буй асуудал нь юу байна вэ мөн биелэлтийг хангах чиглэлээр хэлтэс, агентлагуудын боловсруулсан  төлөвлөгөө, ирэх долоо хоногт гарах үр  дүн зэргийг хэлэлцлээ.  

Үүрэг даалгаврыг ирэх долоо хоногийн Засаг даргын өргөтгөсөн хуралдаанаар хэлэлцэнэ.  Өнгөрсөн долоо хоногийн баасан гарагийн Засаг даргын шуурхай зөвлөгөөнөөр дараах  үүрэг даалгаврыг өгсөн. 

Үүрэг даалгавар: Бүрэнбүст баг, 5-11, 12 дугаар байрны газрыг цаашид хэрхэн ашиглах талаар иргэд оршин суугчдаас санал авч танилцуулах.

• Биелэлт: Бүрэнбүст баг, 5-14 дугаар байрны арын газар ашиглалтын талаар багийн нийт 300 иргэнээс санал авч нэгтгэн, аймгийн ЗДТГ-ын ХЭЗХ-т хүргүүлсэн. Багийн ажлын албанаас дахин санал авах ажлыг   дөрөвдүгээр сарын 21-нээс 25-ны өдрүүдэд зохион байгуулж, 280 иргэдээс санал авч, 100 хувь дахин багийн байр барих саналыг гаргасан.  

Тухайн иргэний ахуйн үйлчилгээний зориулалтай барилгын зургийг өөрөөс нь авч тус зургийн дагуу багийн нэгдсэн байр бариулах саналыг Бүрэнбүст багийн Засаг дарга гарган аймаг, сумын Засаг дарга нарт танилцуулан, Баян-Өндөр сумын ЗДТГ-ын холбогдох мэргэжилтэнд барилгын зургийг хүлээлгэн өгсөн. 
Бүрэнбүст багийн Засаг дарга иргэдээс гарсан санал, хүсэлтийг аймгийн Засаг даргад дахин танилцуулахаар 2025 оны 05 дугаар сарын 16-ны өдрийн уулзалтын цаг авсан хэмээх биелэлтийг Баян-Өндөр сумын ЗДТГ-аас ирүүлжээ.  /Биелэлт 50 хувьтай байна/

Үүрэг даалгавар: Хот тохижуулах газрын техник тоног төхөөрөмжийг сайжруулах чиглэлээр Улаанбаатар хотын “Хот тохижилтын газар” ОНӨААТҮГ-ын тоног төхөөрөмжүүдтэй танилцах   туршлага судалж ирэх. 

• Биелэлт: Улаанбаатар хотын "Хот тохижилтын газар" ОНӨААТҮГ, Баянгол дүүргийн Тохижилт үйлчилгээний газрын үйл ажиллагаатай танилцах, туршлага судлах ажлыг  энэ сарын 5-7-ны өдрүүдэд зохион байгуулсан. Тус ажлын хүрээнд Баянгол дүүргийн зам талбайн 3 дугаар хэсэг, Цэцэрлэгт хүрээлэн, Авто ба Засвар үйлчилгээний хэлтэс, муур нохойны устгалын цэг, Эмээлтийн хог хаягдлын цэгүүдэд ажиллаж туршлага солилцсон. Ажлын тайланг аймгийн Засаг даргад танилцуулахаар ажиллаж байна гэх биелэлтийг Баян-Өндөр сумын ЗДТГ-аас ирүүлжээ. /Биелэлт 70 хувьтай байна/

Үүрэг даалгавар: Хүүхдийн паркийн талаар тодорхой мэдээллийг иргэдэд хүргэх. 

• Биелэлт: Хүүхдийн паркийн ажлыг гүйцэтгэгч “Сокол” ХХК-тай 2025 оны 04 дүгээр сарын 28-нд ажлын явцын талаар хуралдан гүйцэтгэгч компанид албан бичгээр ажлыг шуурхай хийх шаардлага хүргүүлсэн. Тус албан тоотын хариуд барилгын материалын үнэ, тээвэрлэлт, угсралтын үнэд үнийн өсөлт тооцуулах хүсэлтэй талаар хариу ирүүлсэн.  Хүсэлтийн дагуу аймгийн ИТХ-аас байгуулагдсан ажлын хэсэг 14 хоногийн хугацаанд тус ажилтай танилцаж, шийдвэрлэхээр ажиллаж байна. /Биелэлт 30 хувьтай байна./ 

Үүрэг даалгавар:Аймгийн хэмжээнд шинээр баригдаж байгаа барилгын ажлууд дээр мэргэжлийн байгууллагыг оролцуулан Ажлын хэсэг байгуулж, газар дээр нь ажиллаж шаардлагатай зөвшөөрөл, аюулгүй ажиллагааны талаар хяналт шалгалт хийж үр дүнг танилцуулах.

• Биелэлт: Аймгийн Засаг даргын 2025 оны 04 дүгээр сарын 22-ны өдрийн А/320 дугаар захирамжаар аймгийн хэмжээнд баригдаж буй нийтийн зориулалттай орон сууц, барилга, байгууламжийн гүйцэтгэлийн байдалд хяналт хийх ажлын хэсгийг байгуулсан. Хяналт шалгалтыг 2025 оны 04 дүгээр сарын 25-ны өдрөөс 05 дугаар сарын 06-ны өдрүүдэд зохион байгуулж, 31 аж ахуйн нэгж, байгууллагын 34 барилга байгууламж хамрагдсан. Ажлын хэсэг шалгалтын тайлан мэдээ боловсруулах, шалгалтын үр дүн, цаашид авах арга хэмжээний талаар танилцуулахаар ажиллаж байна. /Биелэлт 90 хувьтай байна/ 

Үүрэг даалгавар: ББ парктай холбоотой асуудлыг болзошгүй аваарын зардлаар хийх талаар тооцоо судалгаа гаргаж, Засаг даргын зөвлөлийн хуралд танилцуулах.

• Биелэлт: 2025 оны 05 дугаар сарын 07-ны өдөр аймгийн Засаг даргын зөвлөлийн хурлаар "ББ" паркийн орон сууцны гадна бохир усны шугам, орон сууцны зоорины давхарт тунасан усыг зайлуулах суваг хийх, насос суурилуулах засварын ажлын 25.1 сая төгрөгийн хөрөнгийг болзошгүй аваарын зардлаас гаргахаар шийдвэрлэсэн. /Биелэлт 100 хувь хэрэгжсэн/