Аймгийн 2025 оны хөрөнгө оруулалт бүтээн байгуулалтын ажлын 80 гаруй хувийг инженерийн шугам сүлжээ, авто замын шинэчлэл эзэлж буй. 
40-өөс дээш жилийн насжилттай дулааны шугамаа  эхнээс нь шинэчилж, солих, хүчин чадлыг нь нэмэгдүүлэх хөрөнгө оруулалтын ажил эхэлж байна. Ингэхдээ хотын төвийн  авто замын уулзварууд доорх шугамыг хонгилын системд оруулахаар төлөвлөсөн.  Үүний нэг нь Чандмань төв  орчим юм.
Уг хөрөнгө оруулалтын ажилтай холбоотойгоор  энэ сарын 16-ны 20:00 цагаас 40 хоногийн хугацаанд Баянгийн уулзвараас Чандмань төвийн уулзвар, IV.27-ийн уулзвараас Чандмань төвийн уулзвар руу нэвтрэх авто машины хөдөлгөөнийг хязгаарлана.

Тус байршилд  улс, орон нутгийн төсөв гаднын төслийн санхүүжилтээр хийгдэх дөрвөн хөрөнгө оруулалтын ажил давхцаж буй.  Зам хаах 40 хоногийн хугацаанд хийгдэх хамгийн том ажил нь улсын төсвийн хөрөнгө оруулалтаар 152м дулааны шугамыг өргөтгөж, шинэчлэн, хонгилын системд оруулна. Бетон хийцлэлээр хийх бөгөөд  хаталт, бэхжилтэд барилгын норм дүрмийн дагуу 28 хоног шаардлагатайг мэргэжлийн хүмүүс хэлж байна. Хонгилын системд оруулснаар ирээдүйд зам ухаж хөндөхгүйгээр шугамд засвар, үйлчилгээ хийх боломж бүрдэх юм. 

Мөн жилээс жилд өсөн нэмэгдэж буй Эрдэнэт хотын дулааны найдвартай байдлыг бий болгохын тулд одоо байгаа 400-ын шугамыг 500мм болгон өргөтггөж хүчин чадлыг нэмэгдүүлнэ. Уг ажлыг “Талст билэг” ХХК гүйцэтгэх бөгөөд ажлын чанар гүйцэтгэлд анхаарч, товлосон хугацаанаас өмнө ажлаа дуусгахаа илэрхийлэв. 
Эрдэнэт хотын төв дулааны шугамууд 1976 оноос тавигдсан.  Хамгийн сүүлийнх нь 1989  онд   V  микрээс хойш VII  микр хүртэлх  шугам тавигджээ. Өдгөө 50 жилийн насжилттай шугамд шинэчлэлт хийгдээгүй. Нэг удаа шинэчилсэн шугам нь Уурхайчин III хороолол баригдахтай холбоотойгоор нэгдүгээр цэгээс Холбооны уулзвар хүртэлх 640м шугамыг сольж байжээ.  

Тус байршилд хийгдэх хөрөнгө оруулалтын ажлууд нь....

• Европын сэргээн босголт, хөгжлийн банкны санхүүжилтээр 108м цэвэр усны шугам шинэчилнэ. 
• Орон нутгийн хөгжлийн сангийн санхүүжилтээр Уртцагааны гудамж дагуу байрлах 560 метр урт, 2 хос цэвэр усны шугамыг бүрэн шинэчлэн солино. Энэхүү ажил нь Эрдэнэт хотын 4, 5, 7, 7А, 11-р хороолол, Залуус, Гок гарден, Төгөл гарден, Тамирын 3 чулуу зэрэг хорооллын 6,788 айл өрх, 502 аж ахуйн нэгж, байгууллагаыг найдвартай, тогтвортой цэвэр усаар хангах чухал ажил юм
•   Орон нутгийн төсвийн хөрөнгө оруулалтаар тус хэсгийн авто замыг дөрвөн замын уулзвар болгон шинэчилнэ. 

Аймгийн Цагдаагийн газрын Замын цагдаагийн тасгийн дарга, хошууч Х.Одбаяр:

Баянгийн уулзвараас  баруунаас  зүүн чиглэлтэй явж  байгаа авто машины  хөдөлгөөнийг бүрэн хаана. Баруунаас зүүн чиглэлтэй явах иргэд баруун гар тийшээ эргэн аюулгүй тойргоор улсын чанартай авто зам руу орох эсвэл зүүн гар тийш эргэн Консулын замаар VI микрийн араар явах боломжтой.  IV микрийн арын уулзвар буюу IV.27-ийн уулзвараас урагшаа Чандманын уулзвар руу орох хөдөлгөөнийг хязгаарлана. 

Холбооны уулзвараас ирэх тээврийн хэрэгслүүд хоёр эгнээгээр нааш чөлөөтэй орж ирэх боломжтой. Чандманын уулзвар дээр бүх тээврийн хэрэгсэл зүүн гар тийш эргэх буюу Уурхайчингийн аюулгүйн тойрог руу уруудна.  Тус тойргоос дээш Чандмань чиглэлийн хөдөлгөөнийг хааж,  доош уруудсан нэг чиглэлийн хөдөлгөөнөөр зохицуулалт хийж  байна.

 III,IV микр орчимд хөдөлгөөний ачаалал ихэснэ. Замын цагдаагийн алба хаагчид уртасгасан цагаар ажиллаж, замын хөдөлгөөний аюулгүй байдлыг хангана. 
III.17, III.22 дугаар байрны дунд тээврийн хэрэгслээр сүлжих хөдөлгөөн ихэснэ. Иргэд жолооч нар үүнд хүлээцтэй байж, зохицуулагчийн дохиогоор хөдөлгөөнд оролцохыг уриалж байна. 
Орон сууц хорооллын дунд тээврийн хэрэгслийн хөдөлгөөн ихэссэнээр оршин суугчдын ая тухтай байдал алдагдах, явганаар зорчиж буй иргэн машин ширгүүлэх, машин шүргэлцэх гэх мэт эрсдэл өндөр байх учир аль аль талдаа хүлээцтэй хандахыг уриалж байна. 

Гүйцэтгэгч “ТАЛСТ БИЛЭГ” ХХК-ийн инженер Г.Ганбаяр: 

Чандманын уулзварыг дөрвөн замын уулзвар болгохтой холбоотойгоор газар доогуурх инженерийн шугам сүлжээг зураг төсвийн дагуу  хонгилын  системээр гүйцэтгэнэ. 4.2 дугаар байрнаас Онгийн уулзвар хүртэл 32м нэвтрэх суваг бүхий төмөр бетон хийцлэлтэй газар доорх байгууламжаар шугам явуулна.  Мөн 18м бетон хийцлэлтэй тунель хийнэ. Энэ сарын 16-наас ажлаа эхлүүлээд долдугаар сарын 8 хүртэл хийж гүйцэтгэнэ. Энэ хугацаанд ажлаа шахаж наана дуусгахаар төлөвлөсөн. Энэ бүтээн  байгуулалтын ажилд иргэдийг хүлээцтэй хандахыг хүсэж байна. Төр, иргэн, хувийн хэвшил хамтраад олон жил болсон шугам сүлжээгээ шиэнчлэх  асуудлыг шийднэ гэдэгт итгэлтэй байна. Гол төвөгшилтэй ажил нь бетон хийцлэл. Бетон хийцлэлийн хаталт, бэхжилт барилгын норм дүрмийнхээ дагуу 28 хоног байдаг.  Үүнийг хийчихбэл цаашид Орхон аймаг, Эрдэнэт хотод зам хаах, сэтлэх  тухай асуудал хөндөгдөхгүй. 

ЭДЦС ТӨХК-ийн Дулааны шугам сүлжээ цехийн дарга Л.Анхбат:
Эрдэнэтийн дулааны цахилгаан станцын төв магистрал шугам буюу Холбооны уулзвараас 5-1-ийн Бамбай эмийн сан  хүртэлх 660м шугам таслагдана. Энэ шугамнаас хангагдаж байгаа хэрэглэгчид  3-2, 4-2,  4-16  байр, Худалдаа хөгжлийн банк, Голомт, Гендрекц, аймгийн ЗДТГ,  Молор-Эрдэнэт, Амгалан Оршихуй,  Шүүхийн байр, Хөх монгол цогцолбор, Хангарьд, Чандмань зэрэг зам дагуух орон сууц, төрийн болон  аж ахуйн нэгж байгууллагууд хөрөнгө оруулалтын ажил дуустал хэрэглээний халуун усаар хязгаарлагдана. 

"Эрдэнэт Ус" ДТС ОНӨХК-ийн Ерөнхий инженер Ц.Ууганбаяр:

Халаалт, халуун усаар тэжээгддэг ЦТП 4-2 ,3-2, 4-16 түгээх төвүүд  40 хоногийн хугацаанд халуун ус түгээх боломжгүй болно. 

• ЦТП 4-16 түгээх төвөөс 11б хороолол, Сөүл кастл, Цайхун орон сууцны   122 өрх, Татварын газар, Нийгмийн даатгал, Эрдмийн сан сургууль, авто угаалгууд, 
• ЦТП 3-2 түгээх төвөөс 3-11,  3-12, 3-13,3-16,3-17,3-22 орон сууцны айл өрх, Хөөрхөн гүнж цэцэрлэг, тухайн орчмын ААН-үүд, 
• ЦТП  4-2 түгээх төвөөс 4-14, 4-16, 4-18, 4-20, 4-22-27 орон сууцны байр, ерөнхий боловсролын 4 дүгээр сургууль, 16 дугаар цэцэрлэг, Анхны-Оч эмнэлэг дээрх хугацаанд халуу усаар хангагдахгүй.