Европын холбооноос Монгол Улсад суугаа Онц бөгөөд Бүрэн эрхт Элчин сайд Ина Марчюлёните, ЕСБХБ-ны Монгол дахь Суурин төлөөлөгч Ханнес Такач нар манай аймагт ажиллаж байна. “Эрдэнэт хотын гамшигт тэсвэртэй байдал” төслийн нээлтийн үйл ажиллагаанд хүрэлцэн ирсэн хүндэт зочдыг өнөөдөр орон нутгийн удирдлагууд Ж.Цэвээний нэрэмжит хүндэтгэлийн танхимд хүлээн авч уулзлаа.  
      Уулзалтын эхэнд  аймгийн Засаг дарга Б.Зоригтбаяр орон нутагт хэрэгжүүлэхээр зорьж буй томоохон төсөл хөтөлбөрүүдийн танилцуулгыг хийж, ХАА-н чиглэлээр жижиг дунд үйлдвэрлэлийг хөгжүүлэхэд хамтран ажиллах боломжтой талаар ярьлаа.  Түүнчлэн бүтээн байгуулалтын ажил өрнөж буй дэд бүтцийн салбар, тэр дундаа авто зам, ИШС-ны шинэчлэлийн төслүүдэд хамтран ажиллах хүсэлтээ илэрхийлсэн юм. 
          Мөн Орхон аймаг “Эрдэнэт” үнэт цаас гаргаж ойрын гурван жилдээ дэд бүтэц, боловсрол, эрүүл мэндийн салбарт хэрэгжүүлэхээр зорьж буй төслүүдийн талаар мэдээлэл өглөө. 
Европын холбооноос Монгол Улсад суугаа Онц бөгөөд Бүрэн эрхт Элчин сайд Ина Марчюлёните манай аймагт анх удаа ажиллаж байна. Тэрээр: “Монгол улсын эдийн засгийн гол тулгуур болсон хоёр дахь том хотод хүн амын амьдарлын чанарыг дээшлүүлэх томоохон төсөл хэрэгжүүлж байгаадаа баяртай байна” гэв. Ирэх аравдугаар сард Улаанбаатар хотод  Европын холбооноос зохион байгуулах бизнес форумд оролцож орон нутагтаа хэрэгжүүлэх төсөл хөтөлбөрүүдээ танилцуулахыг урьлаа. 
         ЕСБХБ-ны Монгол дахь Суурин төлөөлөгч Ханнес Такач хэлэхдээ: “ЕСБХБ болон Орхон аймаг, Эрдэнэт хот урт хугацааны хамтын ажиллагаатай. Бид цаашид хамтын ажиллагаагаа улам бүр өргөжүүлэхээр зорьж ажиллана. Ингэхдээ дэд бүтцийн чиглэлээр хийгдэх бүтээн байгуулалтын ажлын ТЭЗҮ боловсруулах, орлогод нийцсэн орон сууцны талаар хамтран ажиллах боломжтой. Нэн тэргүүнд орон нутгийн гаргахаар зорьж буй “Эрдэнэт” бондоор хэрэгжүүлэх дэд бүтцийн ажлуудыг дэмжин ажиллах болно” гэв. 

Мэдээллийн төв