Зуны тэргүүн сарын сарын  шинийн 14,15 буюу энэ сарын 10,11-нд долоон бурхан од, Баян-Өндөр хайрхныг тахих ёслол болно. Энэ талаар өнөөдөр Хутагт ламын Гандан шаддүвлин хийд, Гончигсүмлэн хийдээс мэдээлэл өглөө.

• 2025.06.10-ны 19:30-д Хүрэнбулагийн рашааны баруун талд Тэнгэрийн долоон бурхан од, 
• 2025.06.11-ны 07:30-д Баян-Өндөр хайрхны овоон дээр тахилгын ёслол болох тул иргэд, сүсэгтэн олныг өргөнөөр оролцохыг урьж байна. 

Баян-Өндөр хайрхныг орон нутгийн хамгаалалтад авах шийдвэрийг анх 1998 онд тэр үеийн ИТХ-аас гаргаж байв.  Төрийн тахилгат уул, овоог тахихын өмнө “Долоон бурхан” одыг тахиж, тэнгэр, бурхнаа аргаддаг уламжлалтай. 

Баян-Өндөр хайрхны тахилгын үеэр   лам хуврагууд ном хурахаас гадна 8 тахил, 7 эрдэнийг залж, 4 зүг, 8 зовхист сум харван, аргамаг хүлэг сэтэрлэх зан үйл үйлийг хийдэг ёстой. 
 Баян-Өндөр хайрхан нь өвөр талдаа Эрдэнэт уул, ард талдаа Хүрэнбургастайн нуруу, баруун, зүүн талдаа Их, Бага залуу, Баянцагаан, Даваатын уулсаар хүрээлүүлсэн хангай юм.

Тэнгэрийн долоон бурхан одны тахилгаар дөрвөн цэгээс нийтийн тээвэр иргэдэд үнэ төлбөргүй үйлчилнэ.  Тодруулбал, 19:30 минутад  Амарын талбай, Говилын эцэс, Хорооллын эцэс, Эрдэнэ багаас нийтийн тээвэр иргэдэд үйлчлэх зохион байгуулалтыг хийж байна. 

Хутагт ламын Гандан шаддүвлин хийдийн хамба лам Э.Ширнэн, Гончигсүмлэн хийдийн хамба лам А.Гурван-Эрдэнэ нар сүсэгтэн олонд хандаж тахилгын ёслолд ирэхдээ дээл хувцсаа бүрэн гүйцэт  өмсөж, идээ, будааныхаа дээжийг өргөн хүндэтгэлтэйгээр оролцохыг уриалав.