Энэ онд аймгийн Орон Нутгийн хөгжлийн сангийн хөрөнгө оруулалтаар нийт 43 байршилд авто зам засвар шинэчлэлийн ажлыг хийж гүйцэтгэнэ. Хотын төв хэсэгт хийгдэх авто зам, замын байгууламжийн томоохон ажлуудын нэг нь 19-р цэцэрлэгийн хажуугийн уулзварыг гэрлэн дохио бүхий дөрвөн замын уулзвар болгон шинэчлэх ажил юм. Ажил гүйцэтгэхтэй холбоотойгоор Оросын элчингийн уулзвараас 19-р цэцэрлэгийн уулзвар хүртэлх авто замыг зургаадугаар сарын 12-ны өдрөөс хойш 5 хоногийн хугацаанд хаахаар төлөвлөөд байна.  
          Энэ хугацаанд уулзварын эгнээ өргөтгөх ажил хийгдэх ба газар доорх холбоо мэдээллийн кабель, дулааны шугам хүчитгэх, гэрлийн шон шилжүүлэх, Амгалан оршихуйн ордны хашаан доторх ногоон байгууламжийг шилжүүлэх хашаа татах ажлуудыг хийж гүйцэтгэнэ. 
        Тус тойрог уулзварыг гэрлэн дохио бүхий дөрвөн замын уулзвар болгон шинэчилсэнээр хөдөлгөөн нэвтрүүлэх чадвар нэмэгдэх, аюулгүй байдал хангагдаж зам тээврийн осол гарах эрсдэлгүй зохицуулалттай болно. Ажлын гүйцэтгэгчээр орон нутгийн “Жи пи экспресс финанс” ХХК ажиллаж байна. 
            Энэ хугацаанд Сөүл кастл орон сууцны хотхоноос Баян-Өндөр мед, “Mettle town” орон сууцны хотхоны урд уулзвар хүртэлх авто замаар зорчих хэсэг нээлттэй байна.