Сүүлийн 20 гаруй жил Орхон аймгийн  баяр наадмын хурдан морины уралдаан Булган аймгийн Бугат сумын нутаг дэвсгэрт зохион байгуулж ирсэн. Тус сумын нутаг дэвсгэр газар тариалангийн бүс нутаг учраас  хашаалсан талбайн хэмжээ сүүлийн жилүүдэд нэмэгдсэнээс үүдэлтэй   хурдан морь уралдааны зам талбай хумигдсан.  Тиймээс Орхон аймаг баяр наадмынхаа хурдан морины уралдааныг цаашид  өөрийн аймгийн нутаг дэвсгэрт зохион байгуулахаар Сархиа уулын Сархиагийн аманд  бэлтгэлээ хангаж эхлээд  байна.

Шинээр төлөвлөж буй морь барианы  газар, хурдан морины уралдааны зам засварын ажлын явцын талаар аймгийн "Эрдэнэт хүлэг" МСУХ-ны нарийн бичгийн дарга Н.Отгонбаяр болон дэд тэргүүн Л.Давааням нараас тодрууллаа.

"Эрдэнэт хүлэг"  МСУХ-ны нарийн бичгийн дарга Н.Отгонбаяр:
-Өөрийн аймгийн нутаг дэвсгэртээ хурдан морины уралдааны замтай болохоор бүтээн байгуулалтын ажил өрнөж байна. Аймаг орон нутгийн удирдлагуудын шийдвэрээр Сархиагийн аманд  өөрийн гэсэн морины замтай болж байна.

Морь бариа орчимд эхний ээлжид 300 орчим хүний суудалтай саравч, 2 боловсон 00, тайзны ажил хийгдэж байна. Морь уралдааны зам нэлээдгүй засварын ажил ихтэй. Гэсэн хэдий  ч орон нутгаас төсөв санхүүг нь шийдэн, гүйцэтгэгч компани шалгаран ажлаа эхлүүлсэн байна. Долдугаар сарын 1-н гэхэд дуусгахаар төлөвлөсөн.

"Эрдэнэт хүлэг"  МСУХ-ны дэд тэргүүн Л.Давааням:

-Бугат сум газар тариалангийн бүс нутаг, үүнтэй холбоотойгоор хашаалсан газар жилээс жилд нэмэгдэж хурдан  морины уралдааны зам талбай хумигдах, хурдан мор, унаач хүүхдүүд тор руу орох эрсдэл бий болсон.   Өнгөрсөн жилийн бүсийн уралдаанаар  газар,  газар хурдан хүлгүүд ирж шандсаа сорьсон.  Газар нутгийн хувьд давчуу учраас гарах эрсдэл нь өндөр. Ирэх жил Эрдэнэт хотын 50 жлийн ой тохионо. Мөн л   газар газрын олон хурдан хүлэг ирж уралдана. Тиймээс бид өөрийн гэсэн газар нутагтаа хурдан морины уралдаанаа зохион  байгуулахаас өөр аргагүй болж байна.

Төсвийн тухай хуулиараа ч тэр төсвийн хуваарилалтыг орон  нутагтаа хуваарилж бүтээн байгуулалт хийдэг байх нь зүйтэй.  Энэ жилээс өөрсдийн газар нутагт морь барианы газартай болж байгаа учраас цаашдаа илүү их хөрөнгө оруулалт хийж,  зам харгуйгаа засаад сайхан наадамлах нөхцөл үүсэж байна.

Бугат сумын нутаг дэвсгэрт хурдан морины уралдаанаа зохион байгуулахдаа орон нутаг 8 сая төгрөгийн төлбөр төлдөг, мөн дээр нь зам засварын ажилд жил бүр асар их хөрөнгө зардаг. Цаашид  төлбөрөө төлөөд ч зам харгуйн хувьд  уралдах боломжгүй нөхцөл байдал үүссэн. 

Мэдээллийн төв